انتي رفيعة ليه كده؟ هما بياكلوا أكلك؟ لازم تاكلي عشان يبقى ليكي شكل كده
لأ تلاقيكي مش بتاكلي كويس خدي فيتامينات.. روحي اكشفي.. أنا أعرف ناس كتير كانوا زيك وبقوا كويسين
التيشرت ده جديد؟
مبروك بس شكله مش مظبوط كده كان عاوز يبقى أضيق شوية .. واللون ده كمان مش أوي كنت هات اللون التاني.. جبته ب ١٠٠ جنيه كمان ؟ يعني اتضحك عليك ده أخوه كان قدامي من يومين ب ٢٥ جنيه ومعاه بنطلون هدية
شكلك تخنت أوي.. مش بتحاول تخس؟
انت بس لو عندك عزيمة كان زمانك خسيت من زمان.. زمانك متبهدل بس انت السبب لو خدت قرار وعندك عزيمة كان زمانك خسيت
ابنك ماله كده وشه متغير على طول كده وبعدين هو طالع اسود لمين ده محدش في عيلتنا أسمر؟ ماشي هو السمار مش وحش بس مع القصر بتاعه ده هيبقى شكله إيه في الفصل؟
مفيش حاجة جاية في السكة كده؟ أنا بقول يمكن جد في الأمور أمور ما أنا مسألتكش من تلات أيام يعني .. معلش يا بني ربنا يرزقكم إن شاء الله .. ده أنا أعرف واحد كان مجوز معاكم ومعاه عيل وهيجيب التاني أهو
عملت إيه في الإمتحان؟ صعب إزاي بس؟ أمال هتعمل إيه في الامتحان بتاع المادة الجاية ده المادة دي بالنسبة لها ولا حاجة .. انت عارف أيام ما كنت قدك كنت بذاكر للمادة الجاية دي في وقت المادة اللي انت بتقول صعبة .. يلا ربنا يعينك بس واضح إن مستواك مش أوي إزاي تقول ع المادة دي صعبة ربنا يستر وتعدي السنة دي بقى
مش هنفرح بيكي بقى يا بنتي؟ ربنا يسهل ماشي بس انتي اللي غلطانة .. ما هو مينفعش تفضلي قاعدة كده تستني النصيب يجيلك لغاية عندك .. انزلي كده وخليكي ناصحة .. ده زمايلك كلهم اتخطبوا شوفي عملوا إيه بقى واعملي زيهم
بعيداً عن كلام التنمية البشرية فالنماذج دي بنقابلها كتير في حياتنا .. نماذج مش بس بتتجاوز حدودها وتتدخل في حياتنا لكن بتتدخل بس عشان تقطمنا , تحسسنا دايماً إن فيه حاجة ناقصة , تضيع فرحتنا بأي حاجة , تضيع ثقتنا في نفسنا .. فيه ناس مش بيأثر فيها الكلام ده بصورة كبيرة وفيه ناس ممكن كلمة تجرهم لطريق الاكتئاب.
فيا ريت نبقى لطاف في تعليقاتنا .. مندخلش نفسنا في تفاصيل حياة الناس إلا لو سمحوا بده .. وأما نتدخل بلاش نقطم فيهم .. "فليقل خيراً أو ليصمت"
وعلى الناحية التانية تندرب على إننا مناخدش كلام الناس السلبي كأنه قرآن وإن مش كلمة من واحد تهزنا .. وإن في أوقات كتير رأي الناس مش مهم ومحدش فيهم ليه الحق إنه يعمل نفسه قاضي ويقعد على كرسي عالي عشان يحاسبنا
لا يوجد تعليقات
أضف تعليق